کۆردستان باس - ڕۆژی ١٦ی کانوونی یەکەمی ٢٠٢٤، فەریق روکن عیسا عوزێر سەرۆکی ئەرکانی وەزارەتی پێشمەرگە، به‌بۆنه‌ی كۆتایی هاتنی ئه‌ركه‌كه‌ی وەک فەرماندەی هێزەکانی ئیتاڵیا لە هەرێمی کوردستان، پێشوازی لە کۆڵۆنێڵ سیرۆ فۆرتی فەرماندەی هێزەکانی ئیتاڵیا و تیمێکی یاوەری کرد.
لە دیدارێکدا، لیوا روکن هۆشمەند حەیدەر جێگری سەرۆکی ئەرکان بۆ ئیدارە و میرە، لیوا روکن محمد سعید بەڕێوەبەری هەماهەنگی و پەیوەندییەکانی وەزارەت ئامادەیبوون، کۆڵۆنێڵ سیرۆ فۆرتی کۆتایی هاتنی ئەرکەکەی بەسەرۆکی ئەرکان راگەیاند و کۆڵۆنێڵ ئەنتۆنیلۆ ــی وەک جێگرەوە و فەرماندەی تازەی هێزەکانی ئیتاڵیا لە هەرێمی کوردستان ناساند.
سەرۆکی ئەرکان سوپاسی پێزانینی وەزارەت و هێزی پێشمەرگەی کوردستانی بەکۆڵۆنێڵ فۆرتی گەیاند و کارکردنی بەڕێزیانی لەهەرێمی کوردستان بەرزنرخاند و هیوای سەرکەوتنی بۆ خواست، هاوکات بەخێرهاتنی کۆڵۆنێڵ ئەنتۆنیلۆی کرد و ئامادەیی وەزارەتیشی دەربڕی بۆ کاری هاوبەش و هەمەلایەنە لەپێناو بەرەوپێشبردنی پەیوەندییەکانی نێوان هێزی پێشمەرگەی کوردستان و هێزەکانی ئیتاڵیا و هاوپەیمانی نێوودەوڵەتی.
شایانی باسە، وڵاتی ئیتاڵیا یەکێکە لەو وڵاتانەی کە ئەندامە لەهاوپەیمانیەتی نێوودەوڵەتی دژی داعش و لەسەرەتای دەرکەوتنی داعش وەک یەکێک لەوڵاتانی ئەندام لە هاوپەیمانەتیەکە ڕۆڵێکی گرنگ و بەرچاوی هەبوو لەیارمەتیدانی هێزی پێشمەرگە، پاڵپشتی لۆجستی و راوێژکاری پێشکەش بەهێزی پێشمەرگەی کوردستان کردوە.
