کۆردستان باس - مەسعود بارزانی بە بۆنەی 54مین ساڵوەگەڕی دامەزراندنی یەكێتیی زانایانی ئاینی ئیسلامیی كوردستان، پەیامێك بڵاوی كردەوە و رای گەیاند، هەمیشە ئەو چاوەڕوانییە لە زانایانی ئاینی و مامۆستا بەڕێزەكان هەیە، ڕۆڵی كاریگەری خۆیان لە بەهێزكردنی هەستی نیشتمانپەروەری و بەها مرۆڤییەكان و تەبایی و پێكەوەژیان و هۆشیاركردنەوەی جەماوەر بگێڕن.
ڕۆژی شەممە 21ـی ئەیلوول، مەسعوود بارزانی لە پەیامێکدا ڕایگەیاند: بەبۆنەی 54مین ساڵیادی دامەزراندنی یەكێتیی زانایانی ئاینی ئیسلامیی كوردستانەوە، پیرۆزبایی لە بەرپرس و ئەندامانی مەكتەبی تەنفیزی و ئەنجوومەنی ناوەندیی یەكێتیی زانایان و سەرجەم مامۆستایانی ئاینی پیرۆزی ئیسلام لە كوردستان دەكەم.
ناوبراو دەڵێت، دامەزراندنی یەكێتیی زانایانی ئاینی ئیسلامیی كوردستان لەسەر دەستی مستەفابارزانیی ، دووپاتكردنەوە بوو لە ڕۆڵ و پێگەی مامۆستایانی ئاینی ئیسلامی لە بەشداریكردنیان لە خەباتی نەتەوەیی و نیشتمانی و بەرزڕاگرتنی ڕەسەنایەتی و بەها ئاینییەكان و كولتووری پێكەوەژیان لەناو كۆمەڵگەی كوردستانی و بزووتنەوەی ڕزگاریخوازی كورد.
ئاماژەی بەوەش كردووە، هەمیشە ئەو چاوەڕوانییە لە زانایانی ئاینی و مامۆستا بەڕێزەكان هەیە ڕۆڵی كاریگەری خۆیان لە بەهێزكردنی هەستی نیشتمانپەروەری و بەها مرۆڤییەكان و تەبایی و پێكەوەژیان و هۆشیاركردنەوەی جەماوەر بگێڕن،لەم بۆنە مێژووییەدا هیوای سەركەوتن بۆ یەكێتیی زانایانی ئاینی ئیسلامیی كوردستان و سەرجەم مامۆستا بەڕێزەكان دەخوازم، سوپاسی ماندووبوون و ئەركە پیرۆزەكەیان دەكەم.