کۆردستان باس - لەماوەی کاتژمێرێکدا لە کەرکوک تەقە لە هەردوو بارەگای پارتی و یەکێتی کرا
محەممەد کەمال، بەرپرسی لقی سێی پارتی دیموكراتی كوردستان ڕاگەیاندووە: لە نزیك بارەگای لقەكەیان لە دووشوێنی جیاوازەوە بە قەناسە و دەستڕێژ، تەقە لە بارەگاکەیان کراوە و پاسەوانەکانیان وەڵامیان داونەتەوە شەڕ ڕووی داوە.
بەوتەی ئەو بەرپرسەی پارتی, ئامانجی تەقەکەرەکان گرتنی خاڵێکی پاسەوانی بارەگاکە بووە، کە یەکەمجار تەقە لەوێ کراوە و دواتر بێنە نێو لقەوە و کردەوەی تیرۆریستی بکەن.
محەممەد کەمال، بەرپرسی لقی سێ پارتی وتی: ڕووداوەکە هیچ زیانی گیانی نەبووە، بەڵام پێشهاتێکی خراپە و پێویستە لێکۆڵینەوەی ورد لە بابەتەکە بکرێت.
لە سەرەتای مانگی(12)ی ساڵی رابردووەوە، دوای شەش ساڵ دابڕان لە کەرکوک، پارتی بارەگای لقی(3)ی وەرگرتەوە لە شارەكە وەرگرتەوە. لەم بارەوە پارتی ڕاگەیەنراوێکی بڵاوکردەوە.
دەقی ڕاگەیەنراوەکە:
بەناوی خوای گەورە و میهرەبان
بەرەبەیانیی ئەمڕۆ کاتژمێر ١،٥٠ دەقیقە، لە هێرشێکی ترسنۆکانەدا بارەگای لقی ٣ی پارتیمان کرایە ئامانج، بەڵام ئاگایی و هوشیاری پاسەوانەکانی بارەگای لق ئەم هەوڵەی پووچەڵ کردەوە.
دیارە مەبەستی سەرەکیی هێرشەکە بە ئامانجگرتنی خاڵێکی بارەگای لقمان بووە، یەکەمجار تەقە لەوێ کراوە و مەبەستەکەش ئەوە بووە دواتر بێنە نێو لقەوە و کردەوەی تیرۆریستی بکەن” لە دوو شوێنی جیاوازەوە بە قەناسە و دەستڕێژ، تەقە لە بارەگاکەمان کراوە و بەڵام پاسەوانەکانی بارەگای لق وەڵامیان داونەتەوە”.
ڕووداوەکە هیچ زیانی گیانی نەبووە، بەڵام پێشهاتێکی خراپە و پێویستە لێکۆڵینەوەی ورد لە بابەتەکە بکرێت، لقی سێی پارتیمان، لەسەر سیاسەتی خۆی کە پێکەوەژیان و تەبایی نێوان سەرجەم پێکهاتەکانە بەردەوامە، هەموو جۆرە هەوڵێکی لەم شێوەیەش جگە لە شکستخواردنی نەیاران و پووچەڵ بوونەوەی پیلانەکانیان، هیچ دەرەنجامێکی ئەوتۆی نابێت.
لە هەمان کات دەستڕێژی گولـلە لە بارەگایەکی یەکێتیی نیشتمانیی کوردستان کرا و محەممەد عوسمان، بەرپرسی پێشووی مەڵبەندی یەکێتی لە کەرکووک گوتی: “دوای رووداوەکە چووینە ئەو شوێنەی تەقەی لێوە کرابوو. ئۆتۆمبێلێکی ئۆپڵ لە شۆستەکەی داوە و تێکچووە و جێهێڵدراوە، کە پێدەچێت تەقەکەرەکان بەکاریان هێنابێت.”
گوتیشی، “هیچ زیانێکی گیانی نەبووە و بەگوێرەی ئەزموونمان، گوللـەکان گوللـەی کڵاشینکۆڤ نین و گەورەترن”.
شایەنی باسە، تاوەکو ئێستا پۆلیس و لایەنە ئەمنییەکانی کەرکووک هیچ روونکردنەوەیەکیان لەبارەی ئەو رووداوانەوە بڵاونەکردووەتەوە.