هێزە ئەمنییەکان له‌ناو بازار ژماره‌یه‌ك له‌هه‌ڵسوڕاو و سه‌رپه‌رشتیارو خۆپیشاندانه‌كه‌ی سلێمانییان ده‌ستگیركرد

کۆردستان باس - ڕۆژی دووشەممە ٢٠٢٥/٧/١٤،دوای ڕاگەیاندنی خۆپیشاندان لەلایەن لەموچەخۆرانی ناڕازیی لەسلێمانی، لەئێستادا شوێنی خۆپیشاندانەکە بەهێزێکی ئەمنی زۆر کۆنتڕۆڵکراوەو سه‌رپه‌رشتیارو هه‌ڵسوڕاوانى خۆپیشاندانه‌كه‌ش له‌لایه‌ن هێزه‌ ئه‌منیه‌كانه‌وه‌ ده‌ستگیركران‌و به‌ده‌زگاكانى ڕاگه‌یاندنیش وترا، هه‌ر ده‌زگایه‌و بڕواته‌وه‌و ئێره‌ چۆڵبكه‌ن، "چونكه‌ ڕێگه‌ به‌هیچ گردبونه‌وه‌و خۆپیشاندانێك ناده‌ین".

چه‌ند ڕۆژێكه‌ ژماره‌یه‌ك له‌چین‌و توێژه‌ جیاوازه‌كانى شارى سلێمانى بانگه‌وازییه‌كیان بڵاوكردوه‌ته‌وه‌و ئاماژه‌یان به‌وه‌دابوو، ڕۆژی دوشه‌ممه‌ ده‌چنه‌ سه‌راى ئازادى له‌سه‌نته‌رى شارى سلێمانى‌و خۆپیشاندان ئه‌نجامده‌ده‌ن تایبه‌ت به‌خراپى دۆخى دارایی‌و نه‌بونى موچه‌.

له‌و بانگه‌وازیه‌دا هاتبوو، "خۆپیشاندانى جه‌ماوه‌رى سه‌رجه‌م چین‌و توێژه‌كان "مامۆستا، فه‌رمانبه‌ر، پۆلیس، پێشمه‌رگه‌و كاسبكار"ى دژ به‌تاڵانى موچه‌و قووتى كۆمه‌ڵگه‌ له‌لایه‌ن ده‌سه‌ڵاته‌وه‌ له‌ژێر دروشمى موچه‌كه‌م له‌گه‌مه‌ى سیاسیى بهێننه‌ ده‌ره‌وه‌، ڕۆژى دوشه‌ممه‌ ٢٠٢٥/٧/١٤،كاتژمێر 10ى سه‌رله‌به‌یانى له‌سه‌راى ئازادى سلێمانى به‌ڕێوه‌ده‌چێت".

به‌ڵام به‌یانى دووشەممە هێزێكى زۆرى ئه‌منى له‌ناو بازاڕى شارى سلێمانى جێگیركرابون‌و ڕێگه‌یان به‌هیچ گردبونه‌وه‌و خۆپیشاندانێك نه‌دا، ته‌نانه‌ت به‌ته‌واوى ڕۆژنامه‌وان‌و په‌یامنێرى ده‌زگاكانى ڕاگه‌یاندنیشیان وت، "بڕۆنه‌وه‌ بۆ ده‌زگاكانتان‌و بڵێن ڕێگه‌ى ڕوماڵیان پێنه‌داوین، چونكه‌ ناهێڵین هیچ خۆپیشاندانێك ئه‌نجامبدرێت".

ژماره‌یه‌ك له‌هه‌ڵسوڕاوانى خۆپیشاندانه‌كه‌ له‌لایه‌ن هێزه‌ ئه‌منیه‌كانى سلێمانیه‌وه‌ ده‌ستگیركران.