کۆردستان باس - دوو شەممە ٢٠٢٥/٤/٧، شۆڕش ئیسماعیل، وەزیری پێشمەرگەی حکومەتی هەرێمی کوردستان پێشوازی لە جەنەڕاڵ سکۆت، مولحەقی سەربازی لە باڵیۆزخانەی ئەمریکا لە عێراق و شاندێکی سەربازی یاوەری کرد.
لەو کۆبوونەوەیەدا، کە عبدالخالق بابیری، بریکاری وەزارەت و فریق روکن عیسا عوزێر، سەرۆکی ئەرکان و لیوا روکن بەختیار محمد، ئەمینداری گشتیی و ئەفسەرانی پلەباڵای وەزارەتی پێشمەرگە تێیدائامادەبوون، وەزیری پێشمەرگە و بەرپرسی باڵای بەگری باسیان لە دوایین گۆڕانکاری و ڕەوشی سەربازی و سیاسیی هەرێمی کوردستان،عێراق،ناوچەکە کرد.
لە بەشێکی تری کۆبوونەوەکەدا، لەبارەی پەیوەندییەکانی هێزی پێشمەرگەی کوردستان لەگەڵ هێزەکانی هاوپەیمانان و هێزەکانی ئەمریکا و چاکسازییەکانی وەزارەتی پێشمەرگە و یەکخستنەوەی هێزی پێشمەرگەی کوردستان و ڕووبەڕووبوونەوە و تێکشکاندنی داعش و مەترسییەکانی سەرهەڵدانەوەیان لە ناوچەکەدا، گفتوگۆیان لەبارەوە کرد.
وەزیری پێشمەرگە رایگەیاند:وەزارەتی پێشمەرگە لە چاکسازییەکانی بەردەوامە، ، سەرەڕای ئاستەنگەکانی بەردەم پرۆسەکە، توانیومانە هەنگاوی خێرا و جددی تر بنێین؛ بە پشتیوانی و پاڵپشتی بەردەوامی ئەمریکا و هاوپەیمانەکانمان لە هەرێمی کوردستان.
جەنەڕال سکۆت، پاڵپشتی و پشتیوانی بەردەوامی ئەمریکای بۆ وەزارەتی پێشمەرگە دووپاتکردەوە وتیشی: دڵخۆشین چاکسازی لە ناو هێزی پێشمەرگەی کوردستان بووەتە بنەما و بەرنامەی کارکردنتان،لەم پێناوەشدا پشتیوانیەکانمان بەردەوامە بۆ هەنگاوەکانی چاکسازی لە وەزارەتی پێشمەرگە.
کۆبوونەوەکە بە پتەوکردنی پەیوەندییەکان و هەماهەنگی زیاتر و بەرنامەی کاری پێکەوەیی نێوان وەزارەتی پێشمەرگە و هێزەکانی ئەمریکا لەهەرێمی کوردستان و عێراق کۆتایی هات.
