کۆردستان باس - ٢٠٢٥/٢/١٠ هێزەکانی سوریای دیموکرات (هەسەدە) ڕایگەیاند، هێزەکانی کۆماندۆی سەر بە هەسەدە بە پاڵپشتی هاوپەیمانی نێودەوڵەتی، ئۆپەراسیۆنێکی ئەمنی وردیان ئەنجامدا، کە ئامانجی هەڵوەشاندنەوەی شانەیەکی مەترسیداری ڕێکخراوی تیرۆریستی داعش بو لە باشوری حەسەکە و لە ئەنجامدا دو جەكدار كوژراون و پێنجی دیكەش دەستگیركران
ناوەندی ڕاگەیاندنی هێزەکانی سوریای دیموکرات، ئەمڕۆ دوشەممە لە ڕاگەیەندراوێكدا بڵاویكردەوە، هێزەکانی کۆماندۆی سەر بە هەسەدە دوای چاودێرییەكی ورد و بەردەوامی جموجۆڵەکانی شانەی تیرۆریستی، و دوای كۆكردنەوەی زانیاری تەواو بە پاڵپشتی هاوپەیمانی نێودەوڵەتی هێرشیان بۆ سەر حەشارگەكەیان ئەنجامدا.
ئاماژەی بەوەشكرد، لەشەڕ و پێكدادان لە نێوان هێزەكانی هەسەدە و چەكدارەكانی داعشدا دروستبوە و لە ئەنجامدا چەكدارێك كوژرا و ئەمیری شانەكەش کە ناوی "نەواس" بو خۆی تەقاندوەتەوە و گیانی لەدەستداوە و پێنج چەكداری دیکەش لە ئەندامانی شانەکە دەستگیرکران، بەبێ ئەوەی هیچ زیانێك بەر هێزەكانیان بكەوێت
بەگوێرەی ڕاگەیەندراوەكە، ئەو شانەیەی داعش بەرپرس بوە لە هێرشكردنە سەر تانکەرە نەوتهەڵگرەكان و خاڵە پشکنینەکانی هێزەکانی ئاسایشی ناوخۆ لە چەند ناوچەیەک لە باکور و ڕۆژهەڵاتی سوریا كە لە ئەنجامی چاودێری و بە پشتیوانی هاوپەیمانی نێودەوڵەتی، شوێنەکەیان دەستنیشانكراوە.
ئەوەشی خستەڕو، لە میانەی ئۆپەراسیۆنەکەدا، دەستیان بەسەر ژمارەیەک چەکدا گرت جگە لە بڕێک تەقەمەنی و کەرەستەی سەربازی دیكە كە پێكهاتون لە شەش چەكی كڵاشینكۆف و 213 گولـلەی و 23 مەخزەن، حەوت نارنجۆكی دەستی، پێنج جوبعەی سەربازی و پێنج ئامێر.