کۆردستان باس - ٢٠٢٥/١/٢١ وەزیری بەرگری سوریا ڕایگەیاند:گفتوگۆكانمان لەگەڵ هەسەدە لە كۆتایی نزیكبووتەوە،بەمزوانە گەڕێكی نوێی دانوستەكانی نێوانیان دەستپێدەكاتەوە،هەسەدە رەتیدەكاتەوە گرتوخانەكانی داعش رادەستی دەسەڵاتدارانی دیمەشق بكات.
مرهف ئەبو قەسرە، وەزیری بەرگری سوریا دەڵێت: پێویستە هەموو گروپە چەكدارەكان ملكەچی پەیكەری وەزارەتی بەرگری وڵاتەكەی بن.
ئەبو قەسرە، ئەمڕۆ لەمیانی گفتوگۆیەكدا لەگەڵ گۆڤاری "المجلە" ئاشكرایكرد: ئیدارەی دیمەشق گەیشتووەتە سەرەتای كۆتایی، لەبارەی دانوستەكانی لەگەڵ هێزەكانی سوریای دیموكرات.
قسەكانی وەزیری بەرگری سوریا لەكاتێكدایە، چاوەڕوان دەكرێت بەمزوانە گەڕێكی نوێی گفتوگۆكان لەنێوان هێزەكانی سوریای دیموكرات و ئیدارەی نوێی دیمەشق دەستپێبكاتەوە، گفتوگۆی ئەمجارە لەڕێی دوو لیژنەی جیاواز ئەنجامدەدرێت، كە لیژنەیەكیان تایبەتە بە بواری سەربازی و لەدواین كۆبونەوەی مەزڵوم و عەبدی، فەرماندەی گشتی هەسەدە لەگەڵ ئەحمەد شەرع، سەرۆكی ئیدارەی نوێی دیمەشق لە كۆبونەوەكەی رابردویان لەسەری رێككەوتن.
لەلایەكی ترەوە، هێزەكانی سوریای دیموكرات، رەتیدەكەنەوە دامەزراوەی زیندانییەكانی داعش رادەستی ئیدارەی نوێی سوریا بكەن.
ئاژانسی هەواڵی رۆیتەرز، لەزاری ئەفسەرێك لە پاسەوانی زیندانێك لە شاری حەسەكە، كە نزیكەی (4.500) چەكداری رێكخراوی داعشی تیادا دەستبەسەركراوە، وتویەتی: كە رژێمی ئەسەد روخا هێزەكانیان كەتووەنەتە حاڵەتی ئامادەباشیەوە، داعش سودی زۆری بینوەو ناوچەكانی هەژمونی فراوان كردووە، لە بەرامبەردا هێزەكانیان خۆیان ئامادەكردووە بۆ روبەڕوبونەوەی داعش.
ئاماژەی بەوەشكردووە: رێكخراوی داعش بە كرداری هەوڵی داوە دووجار هێرشبكاتە سەر زیندانەكان، لە هەوڵێكدا بۆ ئازادكردنی لایەنگرەكانی لەدوای روحاندنی رژێمی ئەسەدەوە، پێشبینی ئەوەشیكردوە، داعش هەوڵی تر بدات.