کۆردستان باس - ٢٠٢٥/١/١٩ هێزەکانی دژە تیرۆر و دژە تیرۆری عیراق لەگەڵ هاوپەیمانان ئۆپەراسۆنێکی هاوبەشیان ئەنجامدا و ژمارەیەکی زۆریان لە پاشماوەی تیرۆرستان لەناوبرد.
دەزگای دژە تیرۆر لە راگەیەندراوێکدا کە کۆپییەکی بۆ وێبساتی رەسمی یەکێتی نیشتمانی نێردراوە رایگەیاندووە: "لە چوارچێوەی بەردەوامیی هەوڵەکان بۆ پاککردنەوەی ناوچەکە لە پاشماوەی تیرۆریستان، بە سەرپەرشتی ڕاستەوخۆی وەهاب هەڵەبجەیی، بەڕێوەبەری گشتیی دژەتیرۆر (CTG)، لە ئۆپەراسیۆنێکی هاوبەشدا بە هەماهەنگی هێزەکانی دژەتیرۆر CTG، هێزەکانی دژەتیرۆری عێراق (ICTS) و هێزەکانی هاوپەیمانان (CJTF OIR)، چەندین مۆڵگە و حەشارگەی تیرۆریستان دۆزرانەوە و لەناوبران".
"ئەم ئۆپەراسیۆنە هاوبەشە گورزێکی کاریگەری لە تواناکانی تیرۆریستان وەشاند و بووە هۆی لاوازکردنی زیاتری ژێرخانی لۆجستیی پاشماوەی گرووپە تیرۆریستییەکان لە ناوچەکەدا"، راگەیەندراوەکە وادەڵێت.
ئەوەش هاتووە: "ئەم ئۆپەراسیۆنە بەشێکە لە زنجیرە هەوڵێکی بەردەوام بۆ پاراستنی ئاسایش و سەقامگیریی ناوچەکە و پاراستنی گیان و ماڵی هاوڵاتیان، دژەتیرۆر و هاوبەشە ناوخۆیی و نێودەوڵەتییەکانی بەردەوام دەبن لە هەوڵەکانیان بۆ ڕیشەکێشکردنی تیرۆر و بەرەنگاربوونەوەی هەر هەڕەشەیەک بۆ سەر ئاسایشی ناوچەکە".